July 20, 2024

Желбата за храна може да биде емоционална, ментална или физичка. Затоа, прво обидете се да откриете што се случува во вашето тело и ум кога сте гладни.

Понекогаш тоа се јавува како резултат на чувства како досада, стрес или нервоза, па затоа е добро, пред да посегнете по омилената ужина, да размислите што е тоа што ве „тера“ да јадете.

Ако сте навистина гладни, јадете паметно. Јадете бавно. Размислете пред да изберете храна која ќе го победи гладот ​​и обидете се да ја избалансирате порцијата. Изборот нека падне на храна богата со протеини и растителни влакна. Изберете овошје, салата, јаткасти плодови или чаша млеко.

Стресот и недоволното количество сон се големи непријатели на ситоста и посакуваната фигура, па затоа е првенствено важно да имате добар и квалитетен сон, како и да се обидете да ги надминете изворите на стрес, замор и напнатост.
Чувајте го гладот ​​под контрола: ако е неоправдан, угаснете го апетитот со неколку трикови кои можете да ги искористите за да се надмудрите самите себе.

Пијте вода или незасладен чај
Недостатокот на течност во телото често го регистрираме како чувство на глад. Одличен начин да го спречите гладот ​​е да пиете чаша обична вода. Тоа придонесува за чувството на ситост, а во водата можете да додадете и малку лимон. Исто така и чајот е добар избор. Секогаш можете при рака да имате шолја незасладен чај за да го залажете стомакот.

Не го прескокнувајте појадокот
Најдобар начин да ја надминете желбата за храна која може да ве придружува во текот на денот е да не го прескокнете појадокот. Богатиот појадок може да го спречи гладот ​​кој ќе ве измачува во доцните вечерни часови. Доколку не сте имале здрав и квалитетен утрински оброк, брзо ќе го достигнете чувството на недостаток на енергија и замор, а гладот ​​ќе се јавува почесто во текот на денот.

Започнете го денот со обилен избалансиран оброк кој ќе ве награди со енергија за целиот ден што ви претстои.
Нутриционистите препорачуваат најмалку три цели оброци во текот на денот, кои вклучуваат јаглени хидрати и влакна, протеини и масти. Рамнотежата на овие хранливи материи е важна за чувството на ситост. Ако не сте навикнати да јадете наутро, натерајте се да ја промените таа навика.

Со текот на времето, вашето тело ќе се прилагоди на новиот распоред на оброци. Новата навика можете да ја започнете со помали оброци кои подоцна ќе ги надградите и балансирате.

Јадете супа и салата
Пред главното јадење, секогаш започнувајте го оброкот со чинија топла супа. Супата донекаде ќе ве засити и потоа ќе јадете помалку од главното јадење, кое може да биде богато со калории. Благодарение на високиот процент на вода и малата количина на калории, супата е совршен избор за намалување на апетитот и одржување на саканата телесна тежина.

Вкусната супа од зеленчук добро ќе ве засити и, според некои истражувања, ќе го намали внесот на калории на јадењата што следат.
Исто така, големата порција салата, освен што е здрава, ни дава чувство на потребна ситост. Со секој оброк подгответе голема порција салата од разновиден зеленчук, која ќе ја зачините со минимум сол, маслиново масло и домашен оцет.

Влакната и протеините помагаат

Влакната го намалуваат апетитот. Зеленчукот, овошјето, интегралните житарки, мешунките, освен што се богати со влакна, содржат и големи количини на вода, што придонесува за чувството на ситост. Колку повеќе оброците содржат диетални влакна, толку е поголемо чувството на ситост, а со тоа и ќе ни се намали апетитот. Влакната, исто така, имаат ефект врз хормоните кои го потиснуваат апетитот.

Протеините, исто така, гарантираат дека сме сити подолго време и на тој начин внесуваме помалку калории во телото. Тие го намалуваат лачењето на хормони кои поттикнуваат глад. Храна богата со протеини се риба, месо, јајца, јогурт, јаткасти плодови и слична храна.

Спијте доволно
Погрижете се да спиете најмалку седум или осум часа секоја вечер. Квалитетниот сон помага да се одржи витката линија. Доволното спиење влијае на нивото на лептин кој го контролира апетитот.

Можете да го олесните легнувањето со релаксирачки пијалок, читање на вашата омилена книга или техники за релаксација кои најдобро функционираат за вас, како што се медитација или вежби за дишење.

Се препорачува да не јадете поголем оброк најмалку два часа пред спиење. Сепак, погрижете се никогаш да не одите гладни на спиење. Имајте на ум дека гладувањето пред спиење може да биде знак дека не сте јаделе доволно во текот на денот и дека организмот се обидува да ја компензира дополнителната енергија за да го надомести она што го пропуштил порано.

Leave a Reply

Your email address will not be published. Required fields are marked *